عايزة تتجوزى ؟؟؟؟؟ مانصحكيش

تذكير بمساهمة فاتح الموضوع :

إزيكم يا بنات ويا شباب برده مايضرش ..

إيه مالك ؟ اتخضيتي من العنوان ...

ماتخفيش هتتجوزي ده شر لابد منه .....لكن إنتي في نعمة ومش حاسة بيها عارفة ليه ؟؟ هقولك ..

إنتي دلوقتى عايشة حياتك آخر روقان ودلع وعدم ارتباطك له عشر فوايد مش هتحسي بقيمتهم غير وإنت جوا القفص ....

((( 1 )))

مش هتكوني مضطرة إنك تستحملي شخصية واحد مختلف تماما عن شخصيتك ... ده غير بقي إنه طول الوقت

هيفضل يشخط وينطر قال يعني عامل فيها عنتر وينفعل عليكي بدون داعي ...

((( 2 )))

تاكلي براحتك وبمزاجك الأكل اللي يجي علي بالك من غير ما تقلقي إن كان وزنك هيزيد ولا لاء ده غير إنك هترتاحي

من تعليقاته السخيفة والبايخة ومش هيبقي وراه شغلانة غير التريقة عليكي وإنتي رايحة وجاية قدامو هيقولك يا تخينة

يا فجعانة .. حتي اللقمة باصص فيها ..

((( 3 )))

حياتك دلوقتي عاملة إزاي ..؟؟ بتقومي وقت ما إنتي عاوزة وتنامي وقت ماإنتي عاوزة , تقعدي علي الكمبيوتر ..

تتفرجي علي التلفزيون ... تخرجي مع صحباتك .. يعني عايشة حياتك بالطول والعرض آخر روقان

لكن بعد الجواز انسي كل ده هتلاقيه واقفلك زي الحيطة ويقولك إنتي رايحة فين ؟؟ كنتي فين يا هانم ..؟ بتكلمي مين ؟؟

هيكون مين يعني ... ده غير إنه ممكن يحلف عليكي لو طلعتله الزربونة بالطلاق إنك متروحيش لمامتك وهو داير متسرمح

في كل حتة شوية ... أووووووووووووف حاجة تخنق

((( 4 )))

شنطتك فيها فلوس صح ؟؟ دي فلوسك إنتي لوحدك ...تجيبي بيها اللي نفسك فيه كله قلم روج أو برفان
يعني هتجيبي اللي إنتي عاوزاه من غير ما حد يدخل في مشترياتك .. لكن بعد الجواز لو جيبتي حاجة من نفسك
هيفضل يقولك وده لازمته إيه ؟ إيه الحاجات التافهة اللي إنتي جبتيها دي ؟ مش البيت أولي ؟؟كفاية بعزقة ولمي إيدك ..
أما هو بقي يروح يصرف علي مزاجه وعلي سجايره ولو قلتيله حرام عليك هيقولك هو أنا اللي بشتغل ولا إنتي ...

((( 5 )))

متعودة إنك تقضي يوم معين في الأسبوع في أي مكان بتحبيه ؟ أو متعودة إنك تزوري صحبتك الأنتيم ؟؟
أو متعودة إنك تروحي رحلات مع صحباتك ؟؟؟بتعملي كدة دلوقتي صح ؟؟
هيصي يا بنتي وافرحي ده إنتي في نعمة ... شوفي بقي لو اتجوزتي كل ده هيكون أحلام وذكريات جميلة وهيكون
ممنوع وإلغاء من حياتك تماما

((( 6 )))

عندك هواية معينة بتعمليها صح ؟ زي اشتراكك في المنتديات أو كتابة الشعر أو القرايا
كل ده قوليله باي باي بعد الجواز هيموت يا روحي بعد جوازك انسيه تماما هواياتك الجديدة هتكون ليها شكل تاني خالص
هتكون في هواية الغسيل ونشره طبعا ...وهواية رضاعة الواد اللي عمال يوأوأ ... والبيه جوزك منفضلو وعامل نفسه مش سامع ... ده غير هواية خياطة قميصه وتركيب زرايرو الواقعة علي طول وياريته بيطمر ( رجالة عاوزة الحرق )

((( 7 )))

بتتكلمى وتقولى رأيك فى كل شىء صح؟وفى أى مكان ومع أى حد ومن غير خوف وقلق صح؟
لا يا ماما لااااااااااا إنسى كل ده نهائى بعد الجواز كل كلمة منك هتطلع بحساب وهيكون ليها حساب(
إنت ليه بتقولي كده؟) ما تعدلى لسانك ؟إنتى إزاى تسمحى لنفسك تقولى الكلمة دى,,,, يعني مش هتخلصى من زنو وأرفو

((( 8 )))

انتى بتشتغلى؟اشتغلى أي شغلانة تحبيها وفى أي مكان تختارية لكن بعد الجواز شغلك هو جوزك اللى هيقرفك فى حياتك
بطلباته اللى مش بيخلصو

((( 9 )))

بتحبى محمد حماقى؟بتحبى راغب علامة؟ومغرمة بعيون توم كروز؟ حبى واعجبى بأى مطرب وممثل إنتى عايزاة وبحلقى فى ده وده...مين أدك براحتك بقى.. لكن مثلا لو حبيتى تقولى رأيك في مطرب أو ممثل أمور وشيك هيقولك إيه المياصة دي
حماقي إيه وكروز إيه ؟؟بتحبيهم علي إيه دول ؟؟ بيقولك كده علي أساس أن حضرته عمر الشريف وإنتي مش واخده بالك
وهو بقي يبحلق لنانسي وهيفا ويتنح أدام كليبتاهم وصورهم .. رجالة متملاش عنيها إلا التراب ...

((( 10 )))

وأخيرا اهم حاجة عندك ايه وبتهتمي بيها ايه دلوقتي ؟؟؟
اكيد جمالك ورشاقتك جسمك رشيق ومتناسق صح ؟ مفهوش كرش ولا دهون ؟ وبتلبسي اللي انتي عاوزاه واصغر المقاسات
ده دلوقتي بس .. لكن بعد الجواز هتلبسي إكس إ* إ* إ* لارج
وفي الآخر هيعيب عليكي ويقولك روحي شوفي البنات اللي في بيطلعو في الكليبات عاملين إزاي ... وهو أساسا بيكون
كرشو ادامو شبرين زي مايكون بالع كورة ولا بطيخة

شفتي بقي اقتنعتي ولا لسه ؟؟؟؟؟

وأي بنت مخطوبة أتمنى لها السعادة ويزقها بعريس مناسب

تحياتى للشباب جميعا وانا برضو عند رايي لكل قاعدة شواذ يعنى الكلام دة كل مش معمم علي كل الشباب

انتي محساسني اني هدخل السجن مش هتجواز

المفروض لو فى حب قبل الزواج هيبقى فى تفاهم
ولو فى تفاهم
مكنتيش هتكتبى الموضوع ده
والزواج ايه غير حبة حاجات بتتحط فوق بعض تكون بيت سعيد
الله يكرمكو

HAMADA EL SHEIKH

انت بتقول( لو) يعنى احتمال يكون في حب واحتمال ميكونش في والغالبية مفيش عشان كدة مفيش تفاهم وعشان كدة برضو بتحصل المشاكل الكتير اللى بنسمع عنها

هههههههههههههههههه عندك حق بس ده شر ولابد منه بس فيه اولاد كويسه كتير بس فعلا هما الاقل برده

» للبنات اللى عايزة تعذب اخوها وتجننه !!!!